Gero eta indar handiagoa hartzen ari den Nordic Walking izeneko kirol jarduera probatzeko aukera eskainiko du uztailean Zubikoa kiroldegiak. Europa iparraldetik datorren kirol bat da. Konkretuki, martxa modalitate bat dela esan daiteke. Fondoko eskian oinarria duena.
Bereziki diseinatutako bi makilekin ibiltzean datza, eta makilak mugitzeko teknika bati esker, hankak ez ezik, gerritik gorako gorputz atalak ere asko lantzen dira. Gorputzeko giharren %90 aktibatzen dira Nordic Walking teknika berritzailearen bidez.
Edozein adin eta ezaugarri fisikoko pertsonentzako da egokia. Ibiltzea baino eraginkorragoa da, eta korrika egitean baino askoz gutxiago kargatzen ditugu artikulazioak. Hori horrela, oso kirol egokia da korrika egin ezin dutenentzat, eta paseatzea baino zerbait gehiago egin nahi dutenentzat. Makilekin ibiltzeko teknika erraz ikasten da, eta esaten dutenez, probatu dutenak harrapatuta geratzen omen dira.
Zubikoa kiroldegiko kirol zerbitzuak, Nordic Walking-eko bi talde antolatu nahi ditu. Bata goizez (astelehen eta asteazkenetan 10:30-11:45), eta bestea arratsaldez (astearte eta ostegunetan, 18:45-20:00). Lau saio guztira, bi astetan. Lehenengo txanda uztailaren 6an hasiko da eta bigarrena hilaren 20an. Prezioa, 22,25€ txandako (bazkide ez direnek 28,63€). Kiroldegiko harreran eman behar da izena.