Udalak bidegorri sarea Olabarta auzoruntz osatzeko asmoa du aurten eta horren haritik, bi proiektu ditu eskuartean: Ugarkaldetik Olabarrieta auzo sarreraraino iritsiko den bidegorri zatia alde batetik, eta Udanako igoera hasi aurretik dagoen errepide azpiko pasabidea, bestetik. Bi proiektuak garatzeko, aldundiari diru laguntza eskatzea erabaki du.
Diputatuen Kontseiluak 2013ko martxoan erabaki zuen Gipuzkoako lurralde historikoan bizikleten eta oinezko bideen Udal sarea garatzeko diru laguntzak ematea. Urte horretan bertan, 2013an nahiz 2014an hartarako deialdiak kaleratu ziren eta aurtengo deialdia duela gutxi zabaldu berri da.
Ugarkalde eta Olabarrieta auzoa elkar lotuko dituen bizikleta eta oinezkoentzako bidea, Gipuzkoa 2630 errepideari jarraituz eta honen ertzean egokitzeko proiektua oso aurreratuta dauka Udalak.
Atzo iluntzean egin osoko bilkuran egitasmoa behin betiko onartu eta beharrezkoak diren lurrak eskuratzeko desjabetze espedienteari hasiera ematea onartu zen.
Gipuzkoa 2630 errepide horren 12,7 kilometro puntuan (Udana mendatearen hasieran) bestalde, oinezko nahiz txirrindularientzat azpiko pasabidea egokitzeko proiektua ere badu Udalak. Azken Osoko bilkuran, egitasmoaren bigarren aldaketa hasiera batean onartu zen.
Aipaturiko bi proiektu hauek, 2015eko aurrekontuetan jaso direnez, lanak garatzeko Diputazioaren diru laguntza eskatzea erabaki da.