Aloña Mendiko pilota sailak jakitera eman berri duenez, San Migel egunean profesional mailako pilota jaialdia egongo da Oñatin. Lau terdiko txapelketarako Aspe etxeko azken pilotaria aukeratzeko aurrez-aurrekoak izango dira. 17:00etan hasita, guztira hiru partidu ikusteko aukera eskainiko du karteldegiak.
Azken egunotan etxez-etxe banatu den jai egitarauan partida honen berri jaso ez bada ere, profesional mailako pìlota jaialdi bat lotu du azken orduan Aloña Mendik San Migel egunerako. Lau terdiko txapelketarako Aspe etxeko azken pilotaria aukeratzeko aurrez-aurrekoak izango dira. Dagoeneko, Irribarria, Altuna III, Ezkurdia, Julen Retegi eta Gorkak txartela eskuratuta daukate baina txapelketa horretan egongo den seigarren pilotaria, Oñatiko lehiatik irtengo da.
Honako hau izango da karteldegia:
1.- Dario - Urruzola / Elordi – Erostarbe
(Jaialdia osatzeko, antolatu den binakako partidua)
2.- Elezkano II – Jaka
3.- Mendizabal III – Jaunarena
San Migel egunez Zubikoara hurbildu nahi duten pilotazaleek dagoeneko sarrerak eskuragarri dituzte Aloña Mendi, Arrano, Izarraitz tabernetan eta Txokolateixan 20€-ren truke. Egunean bertan ere, txarteldegian, sarrerak erosteko aukera egongo da.